Навіны і артыкулы
Суд разгледзіць скаргу журналісткі, якую пакаралі за станоўчы сюжэт пра галоўнага ідэолага
У Магілёве суд разгледзіць апеляцыйную скаргу журналісткі-фрылансера Дар’і Чульцовай на рашэнне прызнаць яе вінаватай у парушэнні закона аб СМІ. ...
Слуханне справы прызначанае на 26 лістапада.
Дар’я Чульцова абскардзіла рашэнне старшыні Бялыніцкага райсуда Валянціны Паўлавай пакараць яе штрафам у памеры 20 базавых велічынь (510 рублёў) за відэасюжэт на тэлеканале “Белсат” пра новапрызначанага галоўнага ідэолага краіны Андрэя Кунцэвіча.
Справа ў судзе 18 кастрычніка разглядалася без прысутнасці адказчыцы. Заслухаўшы сведак, суддзя Паўлава прыйшла да высновы, што журналістка парушыла ч. 2 арт. 22.9 КаАП Рэспублікі Беларусь і аштрафавала яе за незаконны выраб прадукцыі СМІ.
Паказальна, што падчас разгляду справы ў судзе Бялыніцкага раёна сведкі: настаўнікі і дырэктар сярэдняй школы № 1 г. Бялынічы, казалі пра тое, што ў сюжэце на “Белсаце” іх словы і меркаванні былі перададзены дакладна.
Сама Дар’я Чульцова не лічыць, што хоць нейкім чынам парушыла беларускае заканадаўства.
Нагадаем, што бялыніцкія праваахоўнікі ў якасці правапарушэння Дар’і Чульцовай інкрымінавалі сюжэт, які выйшаў на тэлеканале “Белсат” 22 жніўня 2019 года ў тэлепраграме “Аб’ектыў” пад назвай “Новы галоўны ідэолаг краіны Андрэй Кунцэвіч. “Гэта чалавек, за якім напэўна пойдзе моладзь”. Сюжэт насіў станоўчы характар і характарызаваў Андрэя Кунцэвіча як чыноўніка новай фармацыі.
